السلام عليكم ورحمة الله 🤗 مبروك عواشركم اليوم جيتكم بمنشور اكثر من رائع على كل اسرار سلو المغربي من الألف إلى الياء للمبتدئات باش يجيكم سلو او السفوف معلك و لذيذ و هماوي كاع لي ذاقو عدكم يحماق عليه
يعتبر سلو أو تقاوت من بين أهم الاطباق الرئيسيه في المائدة المغربية في رمضان
المقادير
2 كيلو دقيق ابيض و قمح محمص
كيلو لوز براليني
كيلو لوز مطحون
2 كيلو زنجلان
6 م ك حبة حلاوة
6 م ك نافع
4 م ك قرفة بلدية
15 حبة من مسكة حرة
2 ݣوزات صغار
ملح
كيلو الا ربع زبدة
3 م ك كليكوز
2 كؤوس عسل او واحد و نصف
كأس و نصف سكر او 2 من سكر صقيل
2 كؤوس زيت بلدية
2 كؤوس زيت رومية
تحضير و الطريقة سلو مغربي صحي
بالنسبة للوز ممكن يتفسخ و يتقلى ، او ندهنوه بالزيت و نخشيوه ف فرن ساخن من قبل و ملي ندخلوه نقصوا الحرارة و مرة مرة نحركوه حتى يتذهب ، و ممكن ايضا نديرو اللوز بقشرتو بلا ميتفسخ غي نرشوه بالما و نمسحوه مزيان بمنديل و ندخلوه للفرن غير يذهب من الداخل ماشي يتحمر بنفس طريقة المفسخ و باش كنتأكدو منو كنحلو لوزة وحدة و نشوفوها واش تذهبات شوية من الوسط
ايضا ممكن نصف كمية اللوز نقليوها مفسخة و النصف الآخر نمسحوه و نقليوه بقشرتو لأن القشرة كتعطي مذاق و طعم افضل، و باش نعرفو الحبة تذهبات بالرغم انها مغطية بالقشرة ، فالحيلة سااااهلة غتاخدو واحد الشوية من اللوز لي مفسخ و تلوحوهم معاه من الأول مجرد ميبانو ليكم تذهبو غي شوية صفيوهم لان كيكملو تحمارهم من بعد بالحرارة لي كيشد ولي تذهب ليها مزيان تصفيه فشي صينية و تفرق الحبات و تحطو فالشرجم يبرد دغيا، و منوصيكمش كنقليو اللوز فزيت باردة مع التحريك المستمر و نار جد هادئة باش لوز ميتحمرش من برا و لداخل خضر و ضروري اللوز فاش تفسخوه متخليوهش يشرب الما لان غيولي خاصو مدة طويييلة باش ينشف و متقليوه حتى تقسمو اللوزة و تلقاوها نشفات و الا غيبقا لاوي و يخسر ليكم طعم سلو و يغمال
دائما نقصوا شوية من كمية اللوز لي كنهرمشوه و الزنجلان لي كنخليوه صاين باش يعطينا قوام مرمل
لي بغا يستعمل ايلان و زريعة الكتان ينيلهم فالطحين ميخليهمش صاينين و نصيحة ضروري سلو تجينا فيه القرمشة و القوام المرمل باش ميوحلش ليكم فالحلق بحال الزميطة
الزنجلان ملي تكونو تحمروه نقصوا عليه باش يتصهد مزيان و يعطي الريحة و يطلق الزيت و يديكم على التحراك باش ميتحرقش لانه غي تيسخن فأي لحظة لغفلتو يتحرق ف تقلبوه بصباعكم غي يتفرتت و يعطي الريحة و هزوه و الافضل تحمروه فالكوكوط لانها كتوزع الحرارة بشكل افضل و ملي يقرب يتحمر ليكم ممكن ديرو عليه شوية تاع الزيت كيخليه مقرمش حسن من الى تحمر بوحدو ايضا ممكن تاخدو كمية من الزنجلان لي غتخليوه صاين و تقليوه فالزيت لي غتستعملو فالسلو هكدا غيجي مقرمش خصوصا لي كيبغي يحتافظ بسلو مدة طويلة و الى عندكم كمية كبيرة قسموه و ديرو الݣميلا تاع الدجاج و بقاو واقفين عليه
حاولو تنقيو جميع المكونات من قبل ولكن مطحنوهمش تال نهار تخلطو سلو باش كيطلقوا الزيت ديالهم و كتبقى نكهتهم بارزة و الى كنتو حمرتوهم من قبل فملي تبغيو تبغيو طحنوهم عاودو سخنوهم
الى عندكم الطحانة لي كطحن مزيااان و كتخرج الزيوت ممكن متحتاجو لا زيت لا زبدة لكن لي بغا الذوق زوين ميخليهمش يطحنو لدرجة يجراو باش يبقى ليه فين يزيد الزيت و الزبدة
حكة تاع الݣوزة ضروري منها كتعطي طعم مميز فسلو، ايضا المسكة الحرة كتعطي النكهة و التعليكة و ريحة غزاالة فالسفوف
حاولو تغلبو ف الحلاوة السكر كلاصي على العسل لان العسل مع المدة كيقصاح و ديما بداو غير بشوية كمية الحلاوة ليجيكم حلو بزاف و يخصكم تزيدو تاني الدقيق و اللوز و ليقامة و نصيحة لي غيدير كمية كبيرة ميخلطهاش كاملة بالعسل
بالنسبة للدقيق ممكن نصف الكمية تقليوها فالزيت و تديوه و تجيبوه حتى يتذهب على نار مهيلة و نصف الكمية تحمر و فاش تحمروا الدقيق فالدار ستعملوا من الافضل كوكوط او شي اناء ثقيل باش يوزع الحرارة بشكل افضل و بقاو تحركوا فيه كل شوية باش تلكدات الدقيق تحمر و ميخرجش سلو باهت فاللون(جربوه بشوية الزبدة او زيت خلطوهم معاه) و ديرو كمية بكمية باش ميغلبكمش و ممكن تحمروه فالفرن ديال الدار على حرارة هادئة شوية و الافضل ديوه للفران تاع الزنقة ههههه ضروري متغربلو الدقيق و بالنسبة للكورات لي كيبقاو ليكم جمعوهم و عاودو فركوهم و حمروهم تاني شوية لأن الدقيق فسلو لمكانش محمر غيخسر ليكم سلو و ميجيش لا لونو لا مداقو زوين زيادة على انه غيضر فالكرش
كل مكونات سلو من دقيق لوز زنجلان كاوكاو خصها تذهب باش اللون يجي زوين و نتوما جربو مثلا حمرتو الدقيق خودو شوية و خلطوه بملعقة زيت و شوفو النتيجة و كل حاجة وقفو عليها لان الى زادت غي شوية فالتحمار فسلو ديالكم ايجي مذاقو مر
بالنسبة للقوام :القرفة، النافع البلدي و البستاني حبة حلاوة فديما ديرو معلقة كبيرة لكل كيلو من المكونات الرئيسية و ممكن تنفصوا من القرفة الى عدكم مجهدة و بلدية كتبقاو ذوقو حتى تحصلو على الطعم المثالي (الدقيق عبرو كميتو بعد التحمار لانه تيفقد كميتوا) و تنأكد خذو كلشي بلدي و طحنوه على يديكم باش يعطيكم طعم ممتاز و بالنسبة لحبة حلاوة و النافع ضروري تصهدوهم تيعطيو الريحة ولكن بلا ميتبدل لونهم غير الجهد لي يخليهم يطحنو و تحيد منهم الرطوبة وبالتالي ميغملش لينا سلو
من الافضل ان تكون كمية الزنجلان و اللوز او الكاوكاو دائما اكثر من كمية الدقيق مثلا 2 كيلو دقيق نديرو معاها 3 كيلو بين اللوز و زنجلان و كاوكاو (اختياري) و متغلبوش الزنجلان على اللوز باش نحصلو على احسن تركيبة فالطعم او على الاقل قد الدقيق قد اللوز و زنجلان باش متحسوش بلي كتاكلو غي الدقيق و لي غيستعمل ايلان و زريعة الكتان ينقص من الدقيق و متكتروش غي زلافة زلافة
بالنسبة للدقيق من افضل ديرو قمح و فورص او فرينة و قمح مهم تفاداو فورص بوحدو لانه غير صحي ثم انه رطب بزاف فالحلق بالنسبة للقمح غربلوه من النخالة الغليظة
نصائح عند الخلط سلو تقاوت رمضان 2022
كل المكونات خصها تغربل مزيان باش ميكونوش تلكدات غربلو ف غربال شطاطو لي عينيه رقاااق او صفاية كبيرة رقيقة
ضروري من القليل من الملح لتوازن المذاقات و كسر حدة الحلاوة
بالنسبة للزبدة خصنا نذوبوها و نخليوها تغلى على شكل زبدة البندق حتى كاع الحليب لي فيها كيتحرق و كيولي لاصق ف قعر الاناء و كتفوح لينا رائحة الكراميل و كنسمعوا فرقعات كتصدرها و اللون تيولي بحال مذهب مزيان و بهاد الطريقة سلو تنحتافظو بيه لاطول مدة لان الحليب لي تيحمض سلو تحرق ، ملاحظة الزبدة خدو نوعية جيدة سنطرال او بدوية مثلا لي متخسرش ليكم الطعم
بالنسبة للزيت النباتية ضروري منغليوها مزيان باش يمشي المذاق ديالها و نصيحة متخلطوش السلو غي بالزبدة لانها مع الوقت كتنشف و كتجمع و مذاقها كيتغير
للتعليكة فسلو ممكن تذوبو الكليكوز و تضيفوه ليه بعدما تنخلطو النواشف و كنحتاجو تقريبا معلقة كبيرة لكل 2 كيلو من النواشف
بالنسبة للزيت البلدية فراه كتعطي مذاق راااائع لسلو و مكتبانش نهااااائيا استعملو غي زيت لي متكونش مجهدة و راه الزيت كيعطي التعليكة
بالنسبة لترتيب الخلط كنبداو بالنواشف المغربلة ثم كنبسبسوهم مزياااان بالزبدة و كندعكوها باش دوز فكاع حبات الخليط عاد كنضيفو الكليكوز و نخدموه مزيان عاد كنزيدو الزيت و هنا السر كلو ديال السلو هو العجن كيخص نعجنوه مزياااااان حتى كاع المكونات يطلقو فبعضياتها و يتعلكوا و يطلقوا الزيت لي فيهم كلما دلكنا اكثر كلما كمية الزيت لي غنحتاجو ممكن نقصو منها هنا ستعملو بانيو و قسموا الخليط حسب الكمية لي عندكم باش ميغلبش عليكم و لي عدها العجانة تستخدمها كتصرع سلو
حاولو متبقاوش غي تزيدو فالزيت باش يعلك ليكم لانه فعلا غيعلكوا لكن بمجرد مغيباش و يرتاح و يخمر حتى غتلقاوه عام بالزيت
بالنسبة للناس لي كتخلط سلو عند العطار صراحة ذقتوا ولكن مكيجيش زوين كيجي معجن عواض معلك ، ممكن طحنوا
اللوز عند العطار ولكن متعطيوهش كل المكونات
شكرا لزيارتك ونأمل أن تقبل دعوتنا للانضمام إلى مجتمعنا ومتابعتنا أيضًا على مواقع أخرى وصفحات التواصل الاجتماعي
انستغرام : وصفات مكتوبة
الفيسبوك : الطبخ المغربي
للمزيد من الوصفات اضغط هنا
تعليقات
إرسال تعليق